“Электрон ҳукумат” тизимининг Рақамли маълумотлар платформаси — тижорат ташкилотлари ва хўжалик юритувчи бошқа субъектлар томонидан ўз тижорат хизматларини кўрсатиш доирасида давлат органларининг ахборот тизимлари ва маълумотлар базаларида мавжуд маълумотларни узатиш учун мўлжалланган аппарат-дастурий воситалар тўплами.
Фойдаланувчиларнинг ахборот тизимларини Рақамли маълумотлар платформасига улаш фақат ҳимояланган ВПН тармоғи орқали ташкил этилади.
Фойдаланувчи ва оператор ўртасидаги ахборот алмашинуви тегишли сўров юбориш йўли билан Рақамли маълумотлар платформаси ёрдамида амалга оширилади.
Рақамли маълумотлар платформасига уланган ахборот тизимлари ва ресурсларида мавжуд бўлган шахсга доир маълумотлар билан ахборот алмашинуви “Шахсга доир маълумотлар тўғрисида”ги Ўзбекистон Республикасининг Қонуни ва ушбу соҳадаги бошқа қонунчилик ҳужжатларига мувофиқ амалга оширилади.
Рақамли маълумотлар платформаси орқали маълумотлар фойдаланувчининг вазифаларини бажариш учун қайта ишлаш мақсадида тақдим этилади.
Фойдаланувчи ўзига тегишли бўлган маълумотларнинг ишончлилиги, тўлиқлиги ҳамда долзарблигини таъминлаш шарти билан уларни бошқа фойдаланувчиларга, давлат органлари ва ташкилотларига Рақамли маълумотлар платформаси орқали белгиланган тартибда шартнома асосида тақдим этиши мумкин.
Рақамли маълумотларни платформага улаш қуйидаги схема бўйича амалга оширилади:
1. Рақамли маълумотлар платформасига уланиш
1-босқич
Фойдаланувчи
Рақамли маълумотлар платформасига уланиш бўйича аризани тўлдириб, операторга юборади.
Хоҳишга кўра
2-босқич
Оператор
Аризанинг белгиланган талабларга мувофиқлигини кўриб чиқади ва Рақамли маълумотлар платформасига уланишни келишади.
7 иш кунида
3-босқич
Оператор, фойдаланувчи
Рақамли маълумотлар платформасига уланиш юзасидан технологик йўриқномани биргаликда ишлаб чиқади ва келишади.
7 иш кунида
4-босқич
Оператор
Фойдаланувчини Рақамли маълумотлар платформасига улаш чораларини кўради.
5 иш кунида
2 .Рақамли маълумотлар платформаси орқали электрон ҳамкорлик ва ахборот алмашинуви
1-босқич
Фойдаланувчи
Идоралараро интеграциялашув платформаси орқали веб-сервис ёрдамида зарур маълумотни олиш учун сўров юборади.
Хоҳишга кўра
2-босқич
Оператор
Сўров таркибининг технологик йўриқномага мувофиқлигини текширади ва сўровни маълумот тақдим этувчига юборади.
Автоматик тарзда
3-босқич
Маълумот тақдим этувчи
Сўровга асосан маълумотларни Идоралараро интеграциялашув платформасига юборади.
Автоматик тарзда
4-босқич
Оператор
Маълумот тақдим этувчи томонидан тақдим этилган жавобни (маълумотларни) фойдаланувчига юборади.
Автоматик тарзда
