Хитойнинг Шанхай шаҳрида энг нуфузли глобал тадбирлардан бири — Бутунжаҳон сунъий интеллект конференцияси (WAIC) ўз ишини бошлади.

Нуфузли халқаро анжуманнинг очилиш маросимида Хитой Халқ Республикаси Раиси Си Сзинпин иштирок этди ва нутқ сўзлади.

Ушбу йирик глобал платформада мамлакатимиз делегацияси ҳам фаол иштирок этмоқда. Хусусан, халқаро тадбирда Ўзбекистон Республикаси Рақамли технологиялар вазири Шерзод Шерматов қатнашмоқда.

Жорий йилги WAIC рақамларда:

Бу йилги конференция ўзининг кўлами ва қамрови билан ажралиб турибди:
140 дан ортиқ форум, панел сессиялари ва очиқ муҳокамалар;
Дунёнинг турли мамлакатларидан 1400 нафардан зиёд етакчи эксперт ва соҳа вакиллари;
1100 дан ортиқ етакчи технологик компаниялар;
Илк бор кенг жамоатчиликка тақдим этилаётган 300 дан ортиқ янги инновацион маҳсулот ва ечимлар.

Тадбир давомида иштирокчилар ва соҳа экспертлари сунъий интеллект, рақамли иқтисодиёт ва инновацияларнинг бугунги ҳолати ҳамда келажагини муҳокама қилмоқдалар. Асосий эътибор қуйидаги масалаларга қаратилган:

AI соҳасида халқаро ҳамкорликни кучайтириш ва илғор тажрибаларни алмашиш;
Сунъий интеллект технологияларини реал сектор ва амалиётга самарали жорий этиш;
Глобал AI бошқаруви механизмларини такомиллаштириш.

Ўзбекистон делегациясининг ушбу тадбирдаги иштироки мамлакатимизда рақамли технологиялар ва сунъий интеллект экотизимини ривожлантиришда халқаро тажрибани татбиқ этиш ҳамда янги ҳамкорлик алоқаларини ўрнатиш учун муҳим майдон бўлиб хизмат қилади.

Манба: egov.uz